І.Брамс – Сімфонія №3 Фа мажор, ор.90
– Канцэрт №2 Сі-бемоль мажор для фартэпіяна з аркестрам, ор.83
Цыкл канцэртаў “КЛАСІКА ДЛЯ ЎСІХ”
Дзяржаўны акадэмічны сімфанічны аркестр Рэспублікі Беларусь
Галоўны дырыжор – народны артыст Беларусі
Аляксандр Анісімаў
Салістка – лаўрэат міжнародных конкурсаў
Алена Навуменка фартэпіяна
Дырыжор – заслужаны артыст Расіі Яўген Бушкоў
***
8 снежня на сцэне Вялікай залы Белдзяржфілармоніі адбудзецца канцэрт Дзяржаўнага акадэмічнага сімфанічнага аркестра Рэспублікі Беларусь з цыкла “Класіка для ўсіх”. У праграме – творы нямецкага кампазітара і піяніста, яркага прадстаўніка эпохі рамантызму Іаганеса Брамса. Сімфанічны аркестр выканае Сімфонію №3 Фа мажор, якую кампазітар прысвяціў вядомаму дырыжору і піяністу Гансу фон Бюлаву, а таксама Канцэрт №2 Сі-бемоль мажор для фартэпіяна з аркестрам. Асноўную партыю выконвае салістка Беларускай дзяржаўнай філармоніі, лаўрэат міжнародных конкурсаў Алена Навуменка. За дырыжорскім пультам у гэты вечар – заслужаны артыст Расіі Яўген Бушкоў.
“Трэцяй Сімфоніі Брамса ў наступным годзе міне 140 гадоў! У адрозненне ад сваіх папярэдніц, поспех суправаджае яе з самага першага выканання аркестрам Венскай філармоніі пад кіраваннем Ханса Рыхтэра. Антанін Дворжак казаў пасля першага праслухоўвання: “Без усякага перабольшання магу сказаць, што гэта сімфонія перасягае ўсе папярэднія, калі і не па маштабе і магутнасці задумы, то цалкам дакладна – па прыгажосці!”
Пра Другі фартэпіянны канцэрт сам аўтар пісаў Клары Шуман: “Я хацеў бы расказаць Вам, я толькі што скончыў маленькі канцэрцік з малюсенькім і чароўным Скерца”. Іронія палягала ў тым, што гаворка ішла аб гіганцкім Фартэпіянным канцэрце, беспрэцэдэнтным па сваім маштабе і цяжкасці партыі саліста. “Неверагодна, але, нягледзячы на велізарны прафесійны ўздым ўзроўню цяперашніх піяністаў, гэты Канцэрт па-ранейшаму прэзентуецца найсур’ёзным выпрабаваннем для саліста”, – расказвае Яўген Бушкоў. “Для мяне новая сустрэча з Дзяржаўным акадэмічным сімфанічным аркестрам Рэспублікі Беларусь – гэта значная творчая падзея, тым больш, што мне мае быць упершыню выконваць з калектывам музыку аднаго з маіх самых любімых кампазітараў. Вельмі спадзяюся, што наша супрацоўніцтва і з аркестрам, і з салісткай зможа даставіць праўдзівае задавальненне ўсім тым, хто без ваганняў адказвае сцвярджальна на пытанне: “Ці любіце Вы Брамса?”»
