“МАЕ ЗОРКІ, МАЕ ГЕРОІ”
Творчы вечар Вольгі Брылон
Імя Вольгі Брылон добра вядома ў прафесійнай музычнай суполцы Беларусі. Яна – яркі і таленавіты музыкавед, вядоўца шматлікіх філарманічных канцэртаў, аўтар і вядоўца вялікай колькасці радыё- і тэлевізійных праграм, член кіраўніцтва Беларускага саюза кампазітараў. Шырокі рэзананс у рэспубліцы атрымала яе кніга “Беларуская эстрада. Настальгічны дывертысмент. Гісторыя эстрады Беларускай дзяржаўнай філармоніі. 1930–1980-я гады”, якая стала энцыклапедыяй беларускай савецкай эстрады. У сезоне 2023/2024 гады ў эфіры тэлеканала “Беларусь 3” адбылася прэ’ера 10-серыйнага фільма “Легенды эстрады”, знятага па гэтай кнізе, дзе Вольга выступіла ў якасці аўтара сцэнара і вядоўцай. З 2008 года яна працуе ў Нацыянальным акадэмічным народным аркестры Рэспублікі Беларусь імя І.Жыновіча Белдзяржфілармоніі – вядзе канцэрты аркестра, з’яўляецца аўтарам і рэжысёрам шматлікіх канцэртных праграм гэтага ўслаўленага калектыву. У 2023 годзе за вялікі ўнёсак у культуру Беларусі Вольга Брылон была ганаравана высокай дзяржаўнай узнагародзе – Медалю Францыска Скарыны.
7 снежня 2024 года а 18 гадзіне ў Малой зале Белдзяржфілармоніі імя Р.Шырмы адбудзецца яе творчы вечар “Мае зоркі, мае героі”. На свой канцэрт Вольга Брылон запрасіла выдатных артыстаў, з якімі яе злучае шматгадовае сяброўства. Гэта – народная артыстка Беларусі, прымадонна беларускай аперэты Наталля Гайда, заслужаны артыст Рэспублікі Беларусь, адзін з заснавальнікаў ВІА “Песняры” Уладзіслаў Місевіч, салісты Белдзяржфілармоніі і аркестра імя І.Жыновіча Ігар Задарожны, Ганна Янкоўская, Анастасія Рачыцкая, Алена Лузан, ВІА “Чараўніцы” і шмат якія іншыя вядомыя артысты і музыканты. Будуць паказаны фрагменты з тэлевізійнага цыкла “Легенды эстрады”.
Адным з сюрпрызаў вечара стане прэзентацыя новай кнігі Вольгі Брылон “Беларускія амазонкі”, прысвечанай творчасці вакальна-інструментальнага ансамбля “Чараўніцы”. Гледачы сустрэнуцца як з сучаснымі ўдзельніцамі гэтага легендарнага жаночага ВІА, гэтак і з яго ветэранамі. На вечары чакаецца шмат цікавых і прыемных адкрыццяў для публікі.
Чакаем нашых гледачоў на гэтым выдатным свяце!
Аўтар і вядоўца праекта – Людміла Шашалевіч.
