I аддзяленне
Рэхіна Сайнс дэ ла Маса – “Рандэнья”
Хаакін Радрыга – “Заклінанне і танец”
Мікіта Кошкін – Саната для гітары і клавесіна (сусветная прэм’ера)
II аддзяленне
Астар П’яцола – “Чатыры пары года” (транскрыпцыя для гітары сола)
Астар П’яцола / Дзмітрый Барадаеў – “Анёл-сюіта” для гітары і струннага квінтэта (прэм’ера ў Беларусі)
“ЧАРОЎНЫЯ ФАРБЫ ВОСЕНІ”
Павел Кухта гітара
Марына Рамейка клавесін
Мінскі струнны квартэт:
Кацярына Мішчанчук скрыпка
Алеся Тарасенка скрыпка
Алена Прановіч альт
Кацярына Акавіцкая віяланчэль
У канцэрце бярэ ўдзел
Данііл Радзівонаў кантрабас
Эстэтычная асалода ў гармоніі з прыродай, усе фарбы восені ў гучанні гітарных струн – у новым аўтарскім праекце Паўла Кухты!
Павел Кухта – адзін з найяскравых гітарыстаў у Еўропе. Выпускнік Беларускай дзяржаўнай акадэміі музыкі і магістратуры (клас дацэнта Я.М.Грыдзюшкі). Лаўрэат больш за 20 міжнародных конкурсаў, што праходзілі ў Аўстрыі, Германіі, Іспаніі, Італіі, Ізраілі, Сербіі, Польшчы, Францыі, ЗША, Расіі, Чэхіі, Украіне, актыўны ўдзельнік шматлікіх міжнародных фестываляў у якасці спецыяльнага госця, члена журы і выкладчыка майстар-класаў.
У восеньскім канцэрце Павел Кухта прэзентуе гучанне гітары ва ўсёй поўнасці фанічных фарбаў – як сольнага інструмента, гэтак і ў ансамблі. Характэрна, што ансамбль гітары саставяць вылучна струнныя інструменты, бо менавіта гукі струнных адрознівае тая адменная ўтульная цеплыня, якая так гармануе з кастрычніцкімі фарбамі. Гукавую прастору расфарбуюць спеўныя смычковыя (іх прэзентуе Мінскі струнны квартэт у складзе скрыпачак Кацярыны Мішчанчук, Алесі Тарасенка, альтысткі Алены Прановіч і віяланчалісткі Кацярыны Акавіцкай, а таксама кантрабасіст Данііл Радзівонаў) і звонкі клавесін, партыю якога выканае цудоўная Марына Рамейка.
У першым аддзяленні прагучаць сольныя творы іспанскіх кампазітараў – “Рандэнья” Рэхіна Сайнса дэ ла Маса і “Заклінанне і танец” Хаакіна Радрыга. Гэтыя творы, што складаюць “залаты рэпертуар” гітарыста, стануць папярэдняй часткай праграмы, што падрыхтоўвае да эксклюзіва – сусветнай прэм’еры Санаты ў 4-х частках для гітары і клавесіна выбітнага расійскага кампазітара Мікіты Кошкіна. Саната была напісана 10 гадоў назад, у 2011 годзе, але дачакалася выканання толькі цяпер, і менавіта беларуская публіка мае гонар стаць першым слухачом гэтага найцікавага твора.
Другое аддзяленне цалкам прысвечана музыцы Астара П’яцолы – “вялікага Астара”, “караля танга”, легендарнага стваральніка ўласнага стылю танга-нуэва, які, нягледзячы на ўсю розніцу менталітэту і тэмпераменту, апынуўся незвычайна блізкім незвычайна блізкім беларускаму сэрцу.
У праграму ўвайшоў адзін з самых папулярных твораў майстра – “Поры года ў Буэнас-Айрэсе” у віртуозным пералажэнні для гітары сола Сэрджыа Асада, а таксама знакамітая “Анёл-сюіта” у пералажэнні для гітары і струннага квінтэта Дзмітрыя Барадаева. Гэты твор таксама будзе выканан ў Мінску ўпершыню.
Вольга Ягорава
